मालेगाव शहरातील समस्यांवर बैठक, जिल्हाधिकाऱ्यांनी दिल्या तातडीच्या कारवाईच्या सूचना :- जिल्हाधिकारी श्री.जलज शर्मा

मालेगाव शहरातील समस्यांवर बैठक, जिल्हाधिकाऱ्यांनी दिल्या तातडीच्या कारवाईच्या सूचना :- जिल्हाधिकारी श्री.जलज शर्मा

मालेगाव शहरातील नागरी समस्यांवर तातडीने उपाययोजना करण्यासाठी 28 जानेवारी रोजी नाशिक जिल्हाधिकारी कार्यालयात बैठक आयोजित करण्यात आली. जिल्हाधिकारी जलज शर्मा यांच्या अध्यक्षतेखाली झालेल्या या बैठकीला आंदोलनकर्ते रामदास बोरसे, निखिल पवार, भरत पाटील तसेच मनपा प्रशासनातील अधिकारी उपस्थित होते.

बैठकीतील मुद्दे आणि निर्णय

या बैठकीत शहरातील विविध समस्यांवर सविस्तर चर्चा करण्यात आली. प्रमुख मुद्दे खालीलप्रमाणे होते:

1. भुईकोट किल्ल्यावरील अतिक्रमण: किल्ल्यावरील अतिक्रमण तात्काळ हटविण्याचे निर्देश देण्यात आले.

2. मोसम नदी प्रदूषण: नदीत सोडण्यात येणारे रक्तमिश्रित व रसायनयुक्त पाणी थांबवण्यासाठी कठोर उपाययोजना करण्यात येणार आहेत.

3. वाहतूक व पार्किंग झोन: शहरातील वाहतूक सुरळीत करण्यासाठी पार्किंग झोन निर्माण करण्याचा निर्णय घेतला.

4. इस्लामाबाद पाईपलाईन बदल: जीर्ण पाईपलाईन बदलून नवीन पाईपलाईन टाकण्याचे काम लवकरच सुरू होणार आहे.

5. गूळ बाजार रस्त्याचे काँक्रिटीकरण: या कामासाठी निधी व वेळापत्रक निश्चित करण्यात येणार आहे.

6. रस्त्यावरील बेकायदेशीर कत्तल: यावर कठोर कारवाईसाठी मनपा प्रशासनाला सूचना देण्यात आल्या.

7. मोकार जनावरे आणि स्वच्छता: मोकार जनावरांच्या समस्येवर तोडगा काढण्यासाठी विशेष पथके नियुक्त करण्यात येणार आहेत.

पाणीपट्टी वाढ रद्द करण्याचे आश्वासन

दरवर्षी होणारी पाच टक्के पाणीपट्टी वाढ रद्द करण्याबाबत आंदोलकांनी मागणी केली. यावर जिल्हाधिकारी शर्मा यांनी शासन मंजुरीच्या अधीन राहून वाढीव पाणीपट्टी अदा केली जाणार नसल्याचे सांगितले. तसेच, पाणीपट्टी वाढ रद्द करण्याचा प्रस्ताव शासनाकडे सादर करण्याचे आश्वासन दिले.

गायरान जमीन आणि दसरा मैदान विकास

गट नंबर 104 व गट नंबर 113 या गायरान जमिनीवरील अतिक्रमण हटवून त्या जागेचा वापर दसरा मैदान म्हणून करण्याचा निर्णय घेण्यात आला. बेकायदेशीर व्यवहारांची चौकशी करून संबंधितांवर कारवाई करण्याचे आदेश जिल्हाधिकाऱ्यांनी दिले.

पुढील बैठक लवकरच मालेगावात होणार

बैठकीच्या शेवटी जिल्हाधिकारी जलज शर्मा यांनी पुढील बैठक मालेगाव येथे घेऊन समस्यांवर प्रगतीचा आढावा घेण्याचे आश्वासन दिले.